Cuenta M.T. en El Correo Gallego que na carballeira de Baltar, na Pastoriza, en Lugo, e presididos polo lema Rexos coma carballos, máis de cinco mil romeiros celebraron onte unha eucaristía exenta de xerarquías eclesiásticas e con propósito galeguista.

Foi a XXXI Romaxe de Crentes Galegos, organizada pola sociación Irimia coa colaboración da asociación cultural A Chaínza, unha celebración na que participaron crentes chegados de toda Galicia.

A primeira e histórica romaxe celebrouse en 1978 no Pedregal de Irimia, Meira, e deulle nome a un grupo nacido coa finalidade de promover "unha Igrexa máis galega e máis implicada na realidade social, económica e cultural. Unha das súas principais teimas desde a súa creación é a da galeguización da Igrexa, especialmente no aspecto litúrxico", dixo Xabier Blanco, do equipo organizador.

"Queremos celebrar o privilexio de ser un pobo con raíces ben fondas das que non queremos nin podemos desprendernos: unha maneira de falar, unha maneira de bailar, unha maneira de rezar, unha maneira de tratar cos demais, coa natureza e con Deus", engadiu.